Kuputaka

Wednesday, 22 October 2014

Whanaungatanga Collaborative E-Book Connected Educator Month 2014



Tuatahi rā, me mihi ka tika ki tōku hoa Tīhau a Sonya Van Schaijik, nāna te kaupapa o tēnei rangitaki i tuku mai. Tuarua, ko tēnei taku rangitaki tuarua e pā ana ki te kaupapa Whanaungatanga. Anei te hononga ki te tuhinga tuatahi - Whanaungatanga

I tēnei rangitaki ka matapakihia te huatau o whanaungatanga me tana hāngaitanga o te tangata ki te tangata, te tangata ki te taiao, ā te tangata ki te ao wairua!

Me pēwhea au e tīmata ai tēnei kōrero.... ka hoki atu ki ngā whakataukī... he iti te kupu he nui tona whakamahukitanga! Nō reira ko te manako ia mā ngā kīpeha nei ōku whakaaro e whakaāhua.


Unuhia te rito o te harakeke,
kei whea te kōmako e kō?
Ui mai ki ahau, 'He aha te mea nui o te Ao?'
Māku e kī atu, 'He tangata, he tangata, he tangata.'

Ka matua kite tēnei whakataukī i te ao mātauranga he mea whakanui i ngā tūhonotanga o tēnā tangata o tēnā hapū o tēna iwi, ā puta noa i te ao. He mauri tō ia tangata, he pukenga tō ia tangata, he wheako tō ia tangata anō nei he mana tō ia tangata, wāhine mai tāne mai! Me whakanui tātou i a tātou anō mō ngā kawenga katoa o tēnā o tēnā. I ngētehi wā he ngawari te whai hoa i ngētehi wā uaua.

He tangata kaha koe ki te whai hoa? He māmā māhau ki te kōrero kanohi ki te kanohi ki ngētehi atu? Mōku ake, he uaua erangi ki te noho te tangata i tōna ake ana, kāore ia i te puta atu, kare e kore ka mokemoke! I tēnei ao hurihuri kāore he take mō te noho mokepuihi! Me whai hoa kōrerorero! Me whai hoa matapaki kaupapa! Kei a tātou te iarere tere (UFB) me ngā rauemi hangarau hei tūhonohono atu ki te ao whānui! Kei a tātou te mana!

Ko au ko te awa
Ko te awa ko au

Kua tikina tēnei pepehā mai i ngā iwi o Te Whanganui hei whakaatu i tētehi hononga o te tangata ki te taiao! E ai ki ngā kōrero tuku iho ko te awa te puna waiora o ngēnei iwi! Mei kore te awa ka kore te tangata. Mei kore te awa ka kore hoki te whenua! Ā, ko te whenua te tūrangawaewae o te tangata. Ki te mate te whenua ka mate hoki te tangata! He paku kōrero whakatūpato hoki i roto i tēnei pepehā arā ki a tātou ngā kaitiaki o te ao! Ko te tangata te kaitiaki o tona ao mai te rangi ki te whenua mai te whenua ki te rangi! Me tiaki, me manaaki, me whakamana!

Ka whakawhiti tātou ki te ao mātauranga, ā ka tere kite atu i te hāngaitanga o tēnei pepehā i te ao ako. Mena, ka kite atu te ākonga i a ia anō i tona taiao ako ka noho mauri tau, ka rite ia ki te ako, ka eke ia ki tona puhikaioreoretanga! Ki te noho honokore te ākonga ka hinga!

Mā te tuakana ka tōtika te teina 
Ma te teina ka tōtika te tuakana


He kīpeha rangiwhāwhā tēnei! He huatau rongonui kē i te ao mātauranga. Ko te nako ko te Ako, ko te nako ko te whanaungatanga! Ki te ruku whakarētō te tangata i te huatau nei ka rangona ka kitea te wairua o ako!
Mahitahi

  • Kōtahitanga
  • Manaakitanga
  • Whakaute
  • Hūmarie

Koinā, mā ngēnei uara, mā ngēnei wāriu ka tōtika te tangata! Aroha atu aroha mai, koha atu koha mai! Mā ngēnei uara ka māmā ake te tūhonohono atu ki tangata kē!


Ko te wairua o te tangata
Te tomokanga ki te atua

I rongo au i tēnei kīanga i tētehi waiata nā te rōpū haka o Te Mana o Māreikura. He kōrero tēnei e whakaahua ana i tētehi hononga o te tangata ki te ao wairua. Ki tō te Māori titiro, he taha wairua tō te tangata. E ai ki a Mason Durie i āna rangahau he taha wairua tō te tangata ko tana hononga ki a ngā matua tipuna, ki te whenua, ki te ao wairua. Ko tona waiaro, ko tona hauora, ko tona mauri! Me kaha ngā taha e whā o te tangata, tona taha tinana, tona taha whanau me tona taha hinengaro. Ki te whati te wairua o te tangata ka hinga! Ki te whakanui te wairua o te tangata ka ora! Nō reira, me whakapono te tangata ki a ia anō ki āna pukenga, ki āna akoranga! Kia hari kia koa kia tau te rongomau ki te mata o te whenua!


He mihi aroha

He kupu whakakōpani tāku mō te kaupapa nui whakaharahara nei o Connected Educator Month - He whatunga tāngata he whatunga mātanga! Nanakia tonu!

Nei te owha nei te whakamānawa atu ki ngā ihu manea mō koutou i whakapau kaha ki te matapaki kaupapa mātauranga nei au ka mihi! 

E te ringa toi e te ringa auaha e Pam Hook nei rā te mihi! He toki koe!

E mihi ana ki te Tākuta Wendy Kofoed mō āna kōrero mō te ao ako i te rautau e tū mai nei. Taputapu kē!

E rere ana ngā mihi ki a koe e te hoa nō Mokoia e Annemarie Hyde mō ngā kōrero hāngai ana ki ngā whare wānanga (MLE). Kino kē!

He mihi kau ki a koe e whaea e Monika Kern mō o kupu e pā ana ki te haumarutanga īpae. Ka mau te wehi! 

Kei ngā taniwha hikuroa o te ao Tīhau e te tuakana @mrkempnz, Craig Kemp nei te tūohu atu ki a koe. Tīhau atu tīhau mai!

Kāore e ārikarika ngā mihi ki te hoa e Philippa Nicoll Antipas mō o kupu hāngai ki ngā ariā ako. Tō koi hoki!

Kei te ringa hangarau e te ringa tutu e Richard Wells mokori anō kia rere a mihi ki koe mō ngā kupu kua karawhiua mai! Meinga meinga!

Kei te ringa whatu, kei te ringa whiti, tātai ki runga tātai ki raro e te wāhine kaha e Karen e mīharo ana au ki a koe me o mahi katoa! Ko koe titoko o te iwi! 

Kāti, e te ihuoneone e Sonya mōu i whakaporo riaka mōu i whakapau kaha ki te whakakaokao i ngā whakaaro me ngā tuhia, e kore e mutu ngā mihi! Ūana te wehi!










2 comments:

  1. Kia ora Tahu,

    Ngā tino mihi ki a koe nau tō aroha i tēnei kaupapa hohonu

    Tino maururu ana te kitea tō mārama, tō tiakitanga e pā ana ki ōku wawata Nā te mea ki ahau nei ko te tino tuāpapa o te kaupapa ko te whanaungatanga

    Panui ana ki ngā kupu Māori i maringi noa ngā roitama i te ataahuatanga me ētahi kupu e mohiotia ai kua pā mai ana i te tōku ngākau

    Otira, he mihi anō ki a koe nau i tuku mihi ki nga kaitito pukapuka i Runga I te huarahi tika, ahakoa he iti he Pounamu

    Ngā mihi nui ki a koe e hoa

    ReplyDelete
  2. Kia ora rā e Tahu. Me tuhituhi tonu koe i ngēnei tū rangitaki mātauranga hei painga mō ngō tātou hoa kaiako, ākonga anō hoki. Whakamīharo ana ngō kōrero!

    ReplyDelete